Янданаькъан Джамалдий 105 шу дизара хетаяь семинар

2021-ча шера май бетта 18-ча дийнахьа Ч.Э. Ахриева ц1ераг1а йолча Г1алг1ай 1илма-тохкама институте д1айихьар Янданаькъан Джамалдий 105 шу дизара хетаяь семинар.
Ховш ма хиллара, Янданаькъан Джамалдий говзамеча Дешо таханара дешашвар кхоачийт истори долча, довзийт вай даьша хьалха леладаь хала наькъаш, цар хьашташ, вахара хьисап. Цул совг1а, из Дош таханарча дешачун дог тохадолийташ, уйлане вохийташ да; иштта, тешшаме гуш да т1абоаг1арий вахаре а хьехам телаш, поэта уж сийрда уйлаш, ноахалашкара ноахалашка ювлаш, яхаргхилар.
Янданаькъан Джамалдий вахарах а кхолламах а лаьца докладаш йийшар 1илма-тохкама института болхлоша:
— Матенаькъан Адама Мухьмадбашир (г1алг1ай багахбувцамеи литературеи отдела кулгалхо) – «Янданаькъан Джамалдий кхоллами халкъа багахбувцами»;
— Ноакастхой 1аьлий Хаваж (редактор) – «О поэзии Джамалдина Яндиева»;
Йовлой Мухтара Аза (г1алг1ай багахбувцамеи литературеи отдела болхло) – «Янданаькъан Джамалдий муг1арашка лела уйлаш»;
— Горчхананаькъан Хасолтий Танзила (г1алг1ай багахбувцамеи литературеи отдела болхло) – «Янданаькъан Джамалдий Даьхенах йола поэзи»;
Иштта, шоай 1илман докладаш йийшар Г1алг1ай паччахьалкхен университета филологически факультета 3-ча курса студенташа:
— Эсмурзанаькъан Фатима – «Янданаькъан Джамалдий вахареи кхолламеи никъ»;
— Исмейланаькъан Муса – «Янданаькъан Джамалдий безама хетаяь лирика»;
— Матенаькъан Камилла – «Яндиев Джамалдин – мыслитель, поэт и переводчик»;
— Ц1ечой П1аьт1амат – «Янданаькъан Джамалдий поэтахи, цун поэзехи йола стихаш».
Семинар д1ахьош яр г1алг1ай багахбувцамеи литературеи отдела болхло Йовлой Мухтара Аза.
Халкъа вахарца, цун гIозача деношца, хиннача халонашца, яьхача коталонашца, халкъа эхь-эзделаца, укх дунен тIа цIена а дика а мел долчунца дувзаденна да Янданаькъан Джамалдий говзаме Дош. Из да ший тайпара поэтика йолаш, дешачарна дег чу дужаш, 1аламах дувца къамаьл юкъе долаш. Из деррига чулоацаш дар докладчикаша дийцар.